Комерцијална банка АД Скопје со потпишувањето на Договорот за заем за одржливо рестартирање на МСП се вклучи во Sustainable Reboot Programme for SMEs in the Western Balkans - Програмата за одржливо рестартирање на мали и средни претпријатија која е основана од страна на Европска Банка за Обнова и Развој (ЕБОР). Целта на програмата е да помогне во финансирањето на инвестициите во микро, мали и средните претпријатија во Република Северна Македонија. Ова ќе помогне за подобрување на нивната конкурентост и усогласеност со техничките стандарди на ЕУ и другите меѓународно признати стандарди.
Најмалку 70 % од поддршката преку оваа Програма ќе бидат алоцирани за инвестиции во заштеда на енергија и зелени технологии, додека останатиот дел е за поддршка на инвестиции во автоматизација, зголемување на продуктивноста, квалитетот и безбедноста на производите.
Средствата од оваа Програма исто така ќе им помогнат на малите бизниси да инвестираат во современи технологии и да се опорават од негативните ефекти предизвикани од Ковид -19 пандемијата.
Крајни корисници се домашни компании од приватниот сектор со најмногу до 249 лица и кои имаат годишен обрт до 50 милиони евра или вкупна актива до 43 милиони евра, вклучително и трговци поединци и физички лица - самостојни вршители на дејност согласно законот на Република Северна Македонија.
Максимален износ на финансирање на еден кредитокорисник е до 1 милион евра (за еден или повеќе под-кредити).
Намената на средствата е исклучиво за основни средства, како и за делот од обртни средства кои се сметаат за дел од трошоците на инвестицијата без вклучен ДДВ. Ова значи дека под-кредитот може да се користи за воведување иновативни процеси во компанијата, како вложувања во индустриски постројки, нова опрема, софтвер, подобрување на системите за управување кај претпријатијата и/или секакво подобрување во насока на усогласеност со директивите на ЕУ во полето на заштита на животната средина, безбедност на работниците, квалитет и безбедност при производство.
Придобивки за кредитокорисниците: по успешна имплементација и верификација на инвестицискиот потпроект, кредитокорисникот е подобен за исплата на стимулација во висина од 15 % од пониската вредност од 1. Искористениот износ од под-кредитот или 2. Трошоците на инвестицијата за потпроектот без вклучен ДДВ, како и бесплатна техничка помош при подготовка и оптимализација на потпроектите од технолошки и финансиски аспект. Стимулацијата и бесплатната техничка поддршка понудени во рамки на оваа Програма се финансирани од донаторите Норвешка, Луксембург и САД, како и од други донатори кои се очекува да учествуваат во финансиската поддршка.
Одобрување
По поднесување на барањето за под-кредит, Банката прави формален преглед дали е документацијата комплетна. Доколку документацијата е комплетна, барањето се обработува, при што се оценува бонитетот на барателот и планираната зделка за која се наменети средствата.
Информациите за клиентот подносител на барањето за под-кредит, Банката ги обезбедува од самиот клиент и од сопствени извори.
Клиентот во разумен рок, со известување, е информиран дали бараниот под-кредит е прифатлив за финансирање или не.